اعذرينى

اعذرينى..

إنى قلبى مش فتحلك

أو ف ليلة جه و ندهلك

و أما جيتى تقربيله..

سك بابه و مش سمحلك

اعذرينى

...

يا أم العيون السود..

و الضفاير ليل ع الخدود ممدود

قلبى أنا بالعلل مرصود..

لا عاد ينفع يحب و لا يتحب

و لو تطلى عليه تلاقيه..

معدشى اصلا قلب

بقا زى جورباح النخل..

تحت الحيطان مسنود

الحيل مهدود..

و الحب مالو حدود..

عايز حيل مشدود..

مش قلب مهزوز

عايش كما الأراجوز

و أنا قلبى خلاص شاب نبضه..

و الوليد قبل الاوان اصبح عجوز

إلكان ع الهوى..

أنا قلبى مش رفضه

و إنى ف يوم أهوى صبية..

إحتمال وارد أو يجوز

أما إعلانى لهواها..

فاهو ده اللى مش ممكن يجوز

و ده شئ منبوذ..

إنى ف هوايا اكون محجوز

شئ مرفوض..

إنى ف هوايا اكون محدود

...

يا زينة الصبايا..

لمى هواكِ و ضحك العيون..

و جوا الضفاير خبيهم

بكره يجيكى واد مجنون..

بكل الحب يرويهم

أما أنا..

فنصيبى من الجنون..

يكفينى اكون شاعر

حب القصايد أسمى أمانيا

أما حب الصبايا..

فكله جبر خواطر

أنا القادر..

و مش قادر ازرع هواكى ف طينى

روحى لحالك و لحالى سيبينى

ميغركيش الحنين اللى ف عيونى

علتى أنا أقوى من حنينى..صدقينى

و اعذرينى